(کابل ټيليګراف (سلواغې ۲۶– ۱۴۰۳ لمريزکال)
وروسته له هغې چې د امریکا سيبياېس ټلویزیونې شبکې راپور خپور کړ چې د امریکا حکومت د غیر قانوني افریقایي او اسیایي کډوالو د ویستلو لړۍ پېل کړې نن د پاناما حکومت تاید کړه چې له امریکا دغه هېواد ته د کډوالو لومړۍ طیاره رارسیدلې.
د پاناما د بهرنیو چارو وزارت په یوه بیان کې ویلي چې دا الوتنې د ټرمپ د ادارې سره د یوه تړون له مخې ترسره کیږي چې غیرپانامايي کډوال به دغه هېواد ته راستول کیږي.
په بیان کې راغلي چې په دغه الوتکه کې ۱۱۹ کسان شامل وو چې د افغانستان، ایران، چین، هند، نیپال، پاکستان، سریلانکا، ازبکستان، او ویتنام هیوادونو وګړي دي.
د سيبياېس ټلویزیون راپور ورکړی وه چې د چهارشنبې په ورځ یوې پوځي الوتکې د هغو کډوالو یوه ډله انتقال کړې چې د ټرمپ د حکومت لخوا نیول شوي وه. دا په امریکا کې د نوي حکومت له راتلو سره د کډوالو د ویستلو لومړی پیل دی.
دغه تلویزیوني شبکه د خپلو اسنادو پر اساس لیکي چې په ویستل شو کډوال کې لویان، کورنۍ او ماشومان شامل دي.
بله نظامي الوتنه چې ټاکل شوې وه پرون پنج شنبه الوتنه وکړي د افریقايي کډوالو یوه ډله یې انتقالوله.
