د اوکراین پوځ وایي چې نن سهار یې د روسیې نږدې پنځلس بې پیلوټه الوتکې رانسکورې کړي.
د اوکراین د پلازمېنې کییف د پوځي چارو د ادارې مشر سرهې پوپکو پر ټیلیګرام چینل لیکلي چې د رانسکورو شویو بې پیلوټه الوتکو ټوټې د پلازمېنې دسنیانسکي پر سیمې راپریوتي، خو ځاني او مالي زیانونه نلري.
د اوکراین پوځ همدا راز ویلي چې د روسیې یو شمېر بې پیلوټه الوتکې، په چرنیهیف، پولتاوا، چرکاسي، سومي او وینیټسیا کې هم راغورځول شوي دي.
بل پلو د روسیې دفاع وزارت ویلي چې په تېرو ۲۴ ساعتونو کې یې د اوکراین ۱۱۳ بې پیلوټه الوتکې د بلګورود، ورونژ، کورسک او بریانسک سیمو کې راغورځولي دي.
