کابل ټیلیګراف – ۶ غویی ۱۴۰۴ لمریز کال
د طالبانو مرستیال ویاند حمدالله فطرت وایي، د دغې ډلې د مشر د حکم پر اساس ځینې نوې ګمارنې شوي دي.
هغه لیکلي چې د کورنیو چارو وزارت د سرحدي پولیسو مخکنی رییس شیر محمد شریف د زابل والي، د زابل مخکنی والي حزب الله افغان د سرحدي پولیسو رییس او د تخار مخکنی امنیه قومندان جان محمد حمزه د کابل د کرنې، اوبو لګولو او مالدارۍ رییس ګومارل شوی دی.
په همدې ترتیب، د سرپل د استخباراتو مخکنی رییس سیف الله د حیرتان بندر کمیسار، د کابل د کرنې مخکنی رییس عبیدالله د بلخ د امر بالمعروف او نهې عن المنکر رییس او د حیرتان بندر مخکنی کمیسار حسین الله زاهد د جوزجان د اقچې ولسوال ګومارل شوی دی.
