کابل ټیلیګراف – ۱۳ غویی ۱۴۰۴ لمریز کال
د متحده ایالاتو محکمې اعلان کړی چې د دلبر په نوم یو افغان وګړی، د یوه جنایي شکایت پر بنسټ چې هغه په ویزې اخیستلو کې د درغلۍ په تور متهم کړی، نیول شوی دی.
که دا تور ثابت شي، دلبر ګل دلبر کیدای شي د ۱۰ کلونو بند سزا سره مخ شي.
د متحده ایالاتو د محکمې مرستیاله او د دې قضیې مسووله میګان کي مکګوایر، د پنجشنبې په ورځ وویل چې دلبر په ۲۰۱۶ او ۲۰۲۱ کلونو کې د متحده ایالاتو د بهرنیو چارو وزارت ته د ځانګړې کډوالۍ ویزې (SIV) لپاره غوښتنې وړاندې کړې وې.
د دلبر په غوښتنو کې د کابل کې د متحده ایالاتو د سفارت څخه جعلي لیکونه، جعلي دندې لیک او جعلي سپارښتلیکونه شامل وو.
د متحده ایالاتو د دادستانۍ په خبرپاڼه کې راغلي چې دلبر په ۲۰۲۱ کال د نومبر په میاشت کې د ځانګړې کډوالۍ ویزې لپاره غوښتنه کړې او په دې غوښتنه کې یې د متحده ایالاتو یوه شرکت څخه یو لیک وړاندې کړی.
د متحده ایالاتو د محکمې څېړنو ښودلې چې هغه شرکت چې دا لیک یې صادر کړی، د یوې پراخې درغلۍ د پلان برخه وه چې د پیسو په بدل کې جعلي اسناد، لکه د دندې تائیدي لیکونه، صادروي.
د دلبر دویم سپارښتلیک هم د یوې داسې کمپنۍ له خوا صادر شوی و چې په درغلي فعالیتونو کې ښکېل وه او جعلي کډوالۍ اسناد یې پلورل.
دلبر د دې لارو په کارولو سره بالاخره وتوانېد چې د متحده ایالاتو ویزه ترلاسه کړي.
د متحده ایالاتو محکمه وایي چې د ۲۰۲۴ کال د مارچ په ۲۰مه، د دلبر غوښتنه تائید شوه، د ۲۰۲۴ کال د اپریل په څلورمه نوموړي ته د متحده ایالاتو د ننوتلو اجازه ورکړل شوه او د ۲۰۲۴ کال د جولای په ۲۲مه یې خپل ګرین کارت واخیست.
دلبر ګل دلبر اوس په نیویارک لویدیځ کې په بوفالو کې ژوند کوي.
د متحده ایالاتو محکمې د اړینو اسنادو له څېړنې وروسته، د ۲۰۲۵ کال د مې په نهمه دلبر محکمې ته احضار کړی او په توقیف کې ساتل شوی دی.
