کابل ټیلیګراف د تلې لومړۍ ۱۴۰۴ لمریز کال
د کرکټ د نړۍ یو له تر ټولو پېژندل شوو امپایرانو، ډکي برډ په ۹۲ کلنۍ کې له دې نړۍ سترګې پټې کړې.
ډکي برډ د خپلې اوږدې او درنې امپایرۍ په ترڅ کې په ۶۶ ټېسټ سیالیو، ۶۹ یو ورځنیو نړیوالو لوبو او ۷ د ښځو په نړیوالو یو ورځنیو سیالیو کې د امپایر په توګه دنده ترسره کړې وه.
هغه د انګلستان اوسېدونکی و او د کرکټ د نړیوال جام د فاینل په ګډون یې په ګڼو مهمو سیالیو کې امپایرۍ کړې ده.
تر امپایرۍ وړاندې، ډکي برډ د لوبغاړي په توګه هم برخه اخیستې وه او په ټولیز ډول یې ۹۳ لومړۍ درجه لوبې (First-class matches) ترسره کړې وې.
د خپل مسلکي ژوند پر مهال هغه د لوبغاړو او مینهوالو تر منځ د خپل عدالت، خندا او ځانګړي سبک له امله ځانګړې محبوبیت درلود.
