ميټا: ايراني هېکرانو د امریکايي چارواکو د واټس اپ د هېک کولو پلان درلود
د واټس اپ، فیسبوک او انسټاګرام ټولنيزو شبکو مالک شرکت یا ميټا وايي، د يوې ايراني هېکرې ډلې هغه پلان يې شنډ کړی چې د امریکا د اوسنيو او پخوانيو ځينو چارواکو د واټس اکونټونو د هېک کولو په هڅه کې وو.
په دغو چارواکو کې د متحده ایالتونو د اوسني ولسمشر جوبايډن او د پخواني ولسمشر او د ولسمشریزو ټاکنو د نومانډ ډونالډ ټرمپ نومونه هم شامل دي.
د میټا کمپنۍ وايي، دا هماغه ډله ده چې د اپریل په میاشت کې يې د امریکا د سياسي، نظامي او ډيپلوماټيکو څېرو د ګوګل او مایکروسافټ اکونټونو د هېک کولو پلان درلود.
د ميټا ادارې په يو بيان کې ويلي د امریکا د ولسمشرۍ ماڼۍ چارواکو ته يې تر دغې پېښې وروسته رسماً خبرداری لېږلی چې د خپلو ټولنيزو شبکو په برخه کې له احتياط کار واخلئ.
د هېکرانو دا ډله د ایران د اسلامي انقلاب ساتونکو (سپاه پاسداران انقلاب اسلامی) ډلې پورې اړه لري او د انټرنيټي خوندیتوب په ټولنه کې د APT42 په نوم یا هم د (CharmingKitten) په نوم شهرت لري چې پښتو کې يې معنی (زړه راکښوونکې پیشو) ده.
دغه راپور د ایران د سایبري فعالیتونو په اړه مخ په زیاتېدونکو اندیښنو ته اشاره کوي چې د امریکا په سیاسي بهیر باندې تمرکز لري. د ګوګل د ګواښ استخباراتو څانګې په وینا، یوه ایراني ډله چې د ایران د سپاه پاسداران سره تړاو لري، هڅه کړې چې د بایډن او ټرمپ سره تړلي کسانو شخصي ایمیل حسابونه هک کړي. دا فعالیت له می میاشتې راهیسې روان دی.
د امریکا استخباراتي چارواکي باور لري چې د ایران سایبري عملیاتو هدف دا دی چې امریکایي رای ورکوونکي ګډوډ او یو له بل څخه لرې کړي، او په دې توګه د امریکا د دیموکراسۍ پر وړاندې بې باوري رامنځ ته کړي. همدارنګه، دا هڅې د دې لپاره دي چې د اسراییلو ملاتړ کمزوری او د هغه نوماندانو مخنیوی وکړي چې د تهران او واشنګټن ترمنځ کړکیچ زیاتولی شي. د ایران د حکومت لخوا د سایبري بریدونو او ناسمو معلوماتو خپرول ښيي چې دا یوه پراخه ستراتیژي ده چې غواړي نړیوال سیاستونه اغېزمن کړي او خپل ګټې خوندي کړي.
ايران د ټرمپ د ولسمشرۍ پرمهال د قاسم سليماني د وژلو او دغه راز د نوموړي د ادارې لخوا د ايران د اټومي تړون د پای ته رسولو او بنديزونو د زياتوالي له امر وروسته له ټرمپ مخه د غچ اخستلو ژمنه کړې وه.
په جولای میاشت کې، د امریکا د ملي استخباراتو رییسې ایورل هینز رسنیو ته ویلي وو چې د ایران حکومت په پټه توګه په امریکا کې له هغو لاریونونو ملاتړ کړی چې په غزه کې د جګړې په اړه ترسره شوي وو. هینز وویل، له ایران سره تړلې ډلې د آنلاین فعالینو په څېر فعالیت کړی او د پوهنتونونو لاریونونو ته د وده ورکولو ترڅنګ یې له ځینو لاریون کونکو ډلو مالي ملاتړ کړی.
