نن افغان ابدالیان د عمان کرکټ لوبډلې پر وړاندې سیالي کوي

نن به د درې اړخیزه سیالیو په لړ کې د افغانستان کرکټ ابدالیان لوبډله د عمان کرکټ لوبډلې سره سیالي ترسره کړي.

د دې درې اړخیزې لوبلړۍ په لومړۍ لوبه کې چې پرون ترسره شوه افغان ابدالیانو لوبډلې د هانک کانګ ملي لوبډلې ته د ۷ وېکټو په توپير ستره ماتې ورکړه.

کریم جنت د هانګ کانګ پر وړاندې لوبه کې د افغان اتلانو په ګټه هر اړخیزه لوبه وکړه. نوموړي په توپ اچونه کې په خپلو ۴ اورونو کې یوازې ۱۷ منډې ورکړې او ۳ مهمې ویکټې یې ترلاسه کړې.

دغه راز، په توپوهنه کې یې په ۲۷ توپونو د ۵ شپږیزو او یوې څلوریزې پرمټ ۴۷ ناسوځېدلې منډې جوړې کړې، چې له امله یې د لوبې غوره لوبغاړي جایزه ترلاسه کړه.

که افغان لوبډله نن دغه سیالۍ وګټي نو پای لوبې ته به لار برابره کړي.

افغان کرکټ بورډ ویلي دي، د دې سیالیو موخه د اسیا ایمرجینګ سیالیو لپاره چمتووالی دی چې د اکټوبر په ۱۸مه نېټه به په عمان کې پيل شي.