لوبې
کرکټ بورډ: د اسیا ځوانانو جام اتلولۍ کې د روزنکو ونډه د ستایلو ده
د افغانستان کرکټ بورډ ویلي د افغان لوبډلې په اتلولۍ کې د لوبغاړو ترڅنګ د لوبډلې د روزونکو او مدیره هیئت ونډه او خواري د ستایلو ده.
کرکټ بورډ په خپله فیسبوک پاڼه لیکلي: د مشر روزونکي نوروز منګل، د توپوهنې روزونکي رییس خان احمدزي، د توپ اچونې روزونکي عبیدالله کونړي، د ډګر ساتنې روزونکی جاوېد نوري او د مدیره هیئت د هر غړي خوارۍ او هلو ځلو د افغان ابدالیان لوبډلې په اتلولۍ کې ستره ونډه درلوده.
دغې ادارې لیکلي، افغانستان کرکټ بورډ د دوی د هڅو او ملاتړ ستاینه کوي، چې په دې ستره بریا کې یې مهمه برخه اخیستې ده.
پرون په عمان کې د اسیا ایمیرجنګ جام سیالیو پایلوبه کې افغان ابدالیانو شریلنکا ته په ماتې ورکولو اتلولي په خپل نوم کړه.
