د هندي سینما هغه پنځه فلمونه چې خلک یې د نندارې په تمه شېبې شماري
سږ کال د هندي سینما بالیووډ فلمي صنعت لپاره خورا ښه ثابت شوی دی.
د شاه رخ خان، شردھا کپور، پراباس او اجی دیوګن په څېر فلمي لوبغاړو داسې فلمونه نندارې ته وړاندې کړي چې نه یوازې د بالیووډ مینه وال یې ستایي بلکې په هندي سینما هم بریالي شوي دي.
په داسې حال کې چې د شردھا کپور “ستري 2” ۸۷۴ کروړه هندي کلدارې، د شاه رخ خان “ډنکي” ۴۷۰ کروړه هندي روپۍ، “پټن” ۱۵۰ کروړه روپۍ او “جوان” ۱۱۴۸ کروړه هندي روپۍ ګټه وټه کړې.
د دې تر څنګ د پراباس فلم ‘کلکي’ ۱۲۰۰ کروړه روپۍ ګټلې، په داسې حال کې چې د اجی دیوګن فلم ‘سنګهم اگین’ چې د همدې میاشتې په لومړۍ نېټه خپور شوی، هم په اتو ورځو کې له ۲۷۰ کروړه هندي روپیو زیاتې پیسې ګټلې دي.
راځئ پنځه داسې فلمونه وګورو چې د خپریدو مینه وال یې په تمه دي.
‘جولي ایل ایل بی 3’
د اکشي کمار ‘جولي ایل ایل بی 3’ یو کامیډي فلم دی چې د سبھاش کپور لخوا لارښود شوی.
دا د جولي ایل ایل بی لړۍ دریم فلم دی چې اکشې کمار، ارشد وارثي، هما قریشي، امریتا راو او سورابه شکلا د پخوانیو ننداره شویو فلمونو څخه خپل تمثیل بیا تکراروي.
دا فلم په اجمیر او راجستان کې شوټ شوی او د ۲۰۲۵ کال د اپریل په ۱۰ به خپور شي.
’ستارے زمین پر‘
“ستار زمین پر” هغه فلم دی چې سږکال جوړ شوی چې د فلم جوړونکي یې په تمه دي.
له دې فلم سره عامر خان دوه کاله وروسته لوی سکرین ته راستنیږي.
د فلم ډیټابیس ویب پاڼې IMDB په وینا، ‘ستار زمین پر’ د 2018 هسپانوي فلم ‘کیمپیونز’ (چیمپینز) رسمي هندي ریمیک دی.
په دې فلم کې عامر خان، جنیلیا دیشمک او دارشیل سفاري کار کړی او لارښود یې آر ایس پرسنا دی.
“ستار زمین پر” به سږ کال د کرسمس په مناسبت خپور شي.
ریډ 2
‘ریډ 2’ د اجی دیوګن د 2018 فلم ‘ریډ’ سیکویل دی.
په دې فلم کې له اجی دیوګن سربیره واني کپور او ریتیش دیشمک هم شامل دي.
د فلم د لومړۍ برخې کیسه د عایداتو د مالیې د یوه افسر (اجی دیوګن) شاوخوا راڅرخي چې د پیسو مینځلو او تورو پیسو په برخه کې د یو ځواکمن شخصیت په وړاندې اقدام کوي.
تر دې وړاندې د «ریډ ۲» د نندارې نېټه د همدې میاشتې په ۱۵ نېټه ټاکل شوې وه، خو اوس به دا فلم د راتلونکي کال د فبرورۍ په ۲۱مه په سینماګانو کې نندارې ته وړاندې شي.
دھړک 2
د تریپاټي ډیماري او سدھارت چترویدي فلم ‘دهړک 2’ یو رومانټیک ډرامه فلم دی چې د شازیه اقبال لخوا لیکل شوی.
دا فلم د جهانوي کپور د فلم “دهړک” سیکویل دی چې په ۲۰۱۸ کې خپور شوی.
“دهړک 2” ټاکل شوې وه چې د روانې میاشتې په ۲۲مه نېټه نندارې ته وړاندې شي، خو اوس به د راتلونکي کال د فبرورۍ په 21 مه خپور شي.
دیوا
د شاهد کپور او پوجا هیګډ فلم “دیوا” د روشن انډریو لخوا لارښود شوی.
د ملیالم صنعت د اداکار پریم پرکاش زامنو بابي او سنجي د دې فلم له لارې په هندي سینما کې د سکرین رایټرانو په توګه لومړی پیل وکړ.
دا فلم د زی سټوډیوز او راج کپور فلمز ګډ تولید دی.
دیوا فلم چې د ۸۵ کروړه هندي کلدارو په لګښت جوړ شوی د راتلونکي کال د فبرورۍ په ۱۴مه به نندارې ته وړاندې شي.
