د ښځو کرکټ نړیوال شل اوریز جام: انګلینډ سکاټلینډ او اسټرالیا هند ته ماتې ورکړي

د ښځو شل اوریز نړیوال جام کې پرون هم دوه سیالۍ ترسره شوې، پکې انګلستان سکاټلینډ ماتې ورکړه او همدا ډول اسټرالیا د هند ښځینه کرکټ لوبډلې ته ماتې ورکړه.

دغه سیالۍ چې په متحده عربي اماراتو کې روانې دي پرون یې په شارجه کرکټ لوبغالي کې د انګلستان او سکاټلینډ ترمنځ سیالۍ وه چې د انګلینډ لوبډله وتوانیده خپلې سیالې د سکاټلینډ لوبډلې ته ماتې ورکړي.

په دویمه سیالۍ کې بیا اسټرالیا د ۹ منډو په تفاوت هندوستان ته ماتې ورکړه.

اسټرالیا چې لومړۍ توپوهنه کړې وه، د ۱۵۲ منډو هدف یې ټاکلی و او هند یې په ځواب کې یوازې ۱۴۲ منډې وکړې.

ټاکل شوې ده چې نن به یوه سیالي د نیوزیلنډ او پاکستان ترمنځ ترسره شي.