عجایب
د پاکستان پارلمان په ارشیف کې خوندي ګڼ شمېر اسنادونه موږکانو خوړلي دي.
د راپورونو له مخې دغه موږکان دومره غټ دي چې ګڼ شمېر اسنادونه یې خوړلي او ګڼ نور یې زیانمن کړی دي، د پاکستان پارلمان ددغو موږکانو له شر څخه د ځان خلاصولو په موخه تر یو ملیون زیاته بودجه ځانګړي کړې.
د پاکستان پارلمان ویاند ظفر سلطاني بي بي سي پښتو ته ویلي چې ډېر موږکان د ودانۍ په لومړي پوړ کې دي چیرته چې د کمېټو دفترونه دي.
په دغه پوړ کې د سیاسي ګوندونو د پارلماني غړو او د وزارتونو د کمېسیونونو د ناستو ترڅنګ په مشرانو جرګه کې د اپوزېسیون د مشر دفتر او د پارلمان رسټورانټ هم شتون لري چې د پارلمان غړي پکې وخت ناوخت خواړه خوري.
ظفر سلطاني دغه راز ویلي چې موږکان دومره لوی دي چې ښایي پشوګانې هم ترې وویرېږي.
